(قصة شخص)هل زياده النزعه الدينيه بهذا الشكل امر طبيعى ام لا ... ارجو المشاركه والنقاش

السلام عليكم ورحمة الله وبركاته

بدايه انا طالب فى كليه الطب وعندى 19 سنه

بصراحه مش عارف مشكلتى دى مشكله اصلا ولا لا ، بس انا عايز اتخلص منها خالص ان شاء الله علشان مفكرش فيها تانى اساسا والموضوع ده هيريحنى جامد

من الطبيعى وانا بالذات ايام الامتحانات فى الكليه النزعه الدينيه بتزيد عندى شويه يعنى بدعى ربنا اكتر وبحاول اتجنب اى حاجه حرام او غلط على قد ما اقدر يعنى مثلا بحاول متخقنش مع حد او مع اهلى او اخواتى مثلا وده برده علشان يكون تركيزى عالى فى المذاكره ..

دلوقتى انا حاسس ان النزعه الدينيه زادت عندى بشكل كبير يعنى مثلا انا قبل كده كنت بسمع اغانى عادى دلوقتى بستحرمها جامد وحاولت اقرى فتاوى عنها وبعدين حاليا انا بسمعها فى حدود حلاله حلال وحرامه حرام ، غير كدا مثل انا كنت بكلم بنات اجانب على النت وانا كده من زمان عادى دلوقتى برده بقيت بستحرم الموضوع ده وقريت برده فيه فتاوى كتير وقالو طبعا ان ده غلط لانه ممكن يودى الى فتنه وخضوع بالقول وكدا بس انا دلوقتى حتى لما بتكلم معاهم بيبقى الكلام عادى مفهوش حب ولا فتنه ولا خضوع بالقول ..

انا بجد بحاول اتقى ربنا على قد ما بقدر وبحاول اتجنب اى حاجه حرام لما اتاكد انها فعلا حرام وغلط علشان انا بيبقى عندى اعتقاد انى مثلا لو عملت حاجه حرام ربنا مش بيوفقنى فى حياتى فى حاجه معينه وبربط بقى يعنى مثلا علشان انا عملت كذا حرام قام حصلى كذا ، مع ان طبعا ربنا مش بشر زينا علشان يحاسب الانسان حاجه بحاجه وعلشان هو عمل حاجه غلط يبقى يحصله كدا والله طبعا غفور رحيم

المشكلتى الاساسيه بقى انى حاسس انى بقى عندى شك فى موضوع الحاجات الحلال والحرام دى ، انا الحمد لله معنديش وساوس قهرى ولا حاجه من دى ، بس مشكلتى الشك بقى عندى زايد اوى يعنى مثلا بشك كتير فى الصلاه انى نسيت مثلا ركعه او سجده او التشهد فى النص فبصلى سجدتى السهو فى الاخر وبرده مثلا ساعات بيبقى عندى شك وانا بتوضا انى متوضوتش كويس مثلا او مغسلتش ايدى مثلا كويس . برده عندى شك فى حاجه كمان ، فى موضوع الكذب ، انا الحمد لله مش بكذب نهائى وبكره الكذب ده جدا جدا جدا ، بس مثلا لو مجاوبتش حد قدامى بدقه بحس انى كذبت عليه وطبعا نيتى مش انى اكذب عليه ولا حاجه ، يعنى مثلا لو عند قرايبى وقلتله معلش انا مضطر اروح دلوقتى علشان عايزنى فى البيت وهما مثلا فى البيت مش عايزنى احس انى كذبت على قرايبى ، وكده بقى واكتر من كده ان الكلام لو مش دقيق اوى وانا بكلم الى حد احس انى كدبت ، واحساسى انى كدبت بقى ده بيخلينى حاسس بالحرمانيه وكدا وبيضايقنى نفسيا اكيد ، فيه حاجه كمان برده انى مثلا بحس ان مينفعش اذكر الله وانا مثلا حاطط رجل على رجل بستحرم الموضوع ده برده احتراما لله ، وبرده ساعات كتير بحس انى متاكد من الكلام اللى بقوله بس وانا بتكلم اقول مثلا باين او تقريبا علشان مبقاش كداب قدام اللى بكلمه مع انى نيتى مش اصدى انى اكدب نهائى ، فانا مشكلتى الاساسيه زياده الشك و بحس انى بقيت بستحرم حاجات كتير وحاسس ان ده كله وساوس نفسيه وشيطانيه ، وانا اصلا برده ايام الامتحانات كانت بتجيلى وساوس كده على الله مثلا ( استغفر الله العظيم ) او تفكيرات شيطانيه كدا واستعذت بالله كتير من الموضوع ده لحد ما اختفى من عندى تقريبا والحمد لله ونسيته خالص ومبقاش يجى فى بالى الحمد لله ، وبحس برده ساعات انى لو اتكلم عن حد يبقى حرام ، انا عارف طبعا ان الكلام على الناس غلط بس مثلا انا بستحرم جامد انى اقول رايى فى حد لو رايى مثلا انه شخص مش كويس او كده علشان مبقاش اغتبته ويبقى حرام عليه وبرده بستحرم انى اتخانق مع صحابى مثلا لو فيه موقف او اشتم حد ، برده ساعات بستحرم كلام عادى ، يعنى مثلا
" سيفتحُ اللهُ باباً كنتَ تحسبهُ.. من شدة اليأسِ لم يخلق بمفتاحِ " ،


علشان مثلا يجيلى هاجس وسواسى ان غلط كلمه مفتاح يخلق مثلا ، او مثلا
إنتبه .. لقد توقف البناء فى جنتك !!!!
.

برده يجلى هاجس ان الجمله دى حرام علشان انا ايش عرفنى مثلا البناء فى الجنه توقف ام لا ، وقيس على كدا حاجات بقى ، ممكن تبقى عاديه جدا بس انا بيجيلى هاجس شيطانى وسواسى وقعد اخترعلها حاجات من دماغى علشان اخليها حرام
تقريبا هى دى مشكلتى بالظبط ، يا ريت حد يرد عليا فى المواضيع دى ..

والف شكر مقدما

بتمنى تقروا الموضوع كله مشان تستفهموا شو القصد